بطولات و مغامرات محشش
يقول المحشش :
كلكم إتعرفون الحرب العالمية الثانية تقريباً بالـ (1935).. آني چان بوكتها عمري 16سنه... المهم گاعد بالبيت دا ألعب بلي ستيشن 2.. دگ الموبايل مالتي (إي لا تتعجبون.. آني من ذاك الوكت عندي موبايل)
إي أكمل لكم.. دگ الموبايل.. جنت حاط نغمة مال هيفاء (بوس الواوا).. شلته.. طلع (رئيس الجمهورية مال روسيا).. گلي: حمودي حمودي. آسفين على الإزعاج بس الوضعية حيل عاوية.. والجيش نصه راح بالزلك..... ...محتاجيك حيل.
آني صفنت..... إتذكرت أيام الطفولة.. مِن چنت ألعب دعابل بروسيا ويه إبن الوزير.
گتله والله عمو... إبطن عيني.. هسه بس أفوّل المولدة التايگر للبيت.. وأجيكم
والله ترست المولدة.. وچيـّـكت الدهن.. وأخذت البايسكل مالتي.. ذبيته (d).. وقبـّـطت سكليتر.. وين؟؟.. على الخط السريع مال (كركوك- موصل).. ومناك گلت آخذ يمنه على روسيا... مطوولت نص ساعة آني بنص موسكو.. بس شحچيلكم!!.. باردة ثلج.
شغلت التدفئة مال البايسكل و صعّدت الجامات... گلتلهم وين بيت رئيس الجمهورية؟؟.. گلولي بقطـّاع 20 يم مرطبات (عزاوي جرثومه)
وصلت.. دگيت الباب.. طلع أبو منذر (إبن الرئيس الروسي إسمه علي حميد لأن مرته من الديوانية).. خطيه الرجال حالته جانت زفت.. حضنـّي.. وگلي الله جابك.. گتله خير عمو؟؟.. گال هيچ وهيچ السالفة.. والألمان طبوا بينه گول.. گتله عمو.. صدگ چذب.. آني موجود وهيچ يصير!!!
آني رايح.. منا ليومين إن شاء الله تسمع خير
طلعت رحت على ولد أعرفه بروسيا اسمه (ناظم نص) هذا شقاوة مال بغداد چان وصديقي الروح بالروح.. گتله نظومي هيچ وهيچ الفلم أريد أسلحه.. گلي تدلل شتريد؟؟.. گتله اريد 65 صاروخ (أرض- أرض)..... و34 صاروخ (أرض- مي) اقصد (ارض- جو)..... و 89بي كي سي..... و فد 6784 رمانه يدويه...... و54564 لغم منوع بين مضاد للبشر ومضاد للدبابات
والله حطلياهن بعلاگه.. اخذتهن وعدل وگٍبل للجبهه.. وين؟؟.. بالخطوط الأماميه... ما اجذّب عليكم الوضعيه صدگ چانت داچـّه (يعني تعبانه).. بس اني اخوكم خوما اخاف!!.. لا يابه لا... گلتلهم للجنود انتوا لمـّوا چوالاتكم ورجعوا لبيوتكم.. مالكم علاقه.. السالفه يمي صارت
باوعت يمنه.. يسره.. شحچيلكم بلـ (564674534 جندي ألماني).. وكل واحد راكب دبابة منفيست حديث.. بس اني تعرفوني سبع.
نصبّت الصواريخ على چتفي وصيـّحت... اني إلكم.. طبا طبا.. طاخ طاخ طاخ.. الزگه.. جيبه.. ودي.. الله.. إصلخه.. ألطمه (هاي موسيقه تصويريه).
والله صفيتهم بقوا بس 7 جنود ودبابتين واني باقيلي رمانه وعلچ أبو السهم...... شسويت؟.. لزگت العلچ أبو السهم بالرمانه وشمرتها على الدبابة.. لزگت بيها.. وچان تنفجر.
بقت دبابة وحدة.. ركضت عليها وبيدي قلم أبو النبالات (لحد يگولي منين جبته.. هوه إجه)... والله وبالقلم گطعت السرفه (يعني التايرات مال الدبابه).. وگفت... گـُمزت عالقمارة.. فتحت الباب.. نزّلتهم بيدي.. واخذتهم أسرى.
طبعا وره ما هيچ سويت.. إجه الرئيس الروسي وباسني من راسي وگلي:.. انته اقوه من گرندايزر والله..
گتله:.. لا عمو ما سويت شي آني.. عادي.. وانطاني هديه سيارة لادا بعدها ما ماشيه بالچيس.. واشترولي بنطرون كتان أصلي من الصين درجة أولى.. وبوتين أديداس أبو العلامة.
رجعت للبيت.. وشغلت المولدة.. وگعدت اتفرج (توم وجيري)
..انا اكره الجذب
تحياتي اتمنى عجبكم يموت ضحك
